6abaziat: 2010

A Dream

امبارح حلمت حلم جد غريب وملوش خص

كان في معي بالحلم اكمن ممثل اجنبي ناسي مين كانو..كنا ع اساس عصابة ورايحين نعمل عملية نصب او اشي زي هيك..المهم كنا طالعين بباص مؤسسة من رغدان..نزلنا من الباص عند الدفاع المدني اللي بيكون عاليمين وانتا رايح عالزرقا

فهمت منهم انو انا اللي رح اكون الطعم او الاشي اللي بدو يضحك عالطرف التاني..فرجوني بيت وقالولي بتروح عليه وبتنفذ اللي اتفقنا عليه..وهم عليهم ابصر وين يروحو ومن هناك يتصلو بالطوارئ..وبس تيجي الطوارئ والمطافي عالبيت اللي رح اكون انا فيه ساعتها رح تبلش الخطة ومن هالحكي..بس المهم بالموضوع انو انا ما انشغل بأي اشي

المهم وصلت البيت..شقة هيك كانها تاني طابق ببناية قديمة

فتحت الباب في زي ممر..اول ما تفوت في عاليسار كاونتر واقف وراه هيك طباخ صيني..لون الجو كان زي الزهري

المهم انا بس فتحت الباب خف عقلي من الريحة الصح اللي بالمكان..بقول للطباخ انو يعني شو هالريحة اللي من الاخر اللي عندك..بيحكيلي اه احنا بنطبخ وهيك اذا جيعان..بقوللو شو اكتر اشي العالم بتطلبو من هون..بيحكيلي سندويشات جاج بالكاري..أشرلي على كرتونة بالممر فيها زي قطع سمك فيليه..بس جاج مش سمك!..ومطبوخة خالصة!..فانو خف عقلي انو ليش حاطهم بكرتونة

المهم انا عند هاللحظة يعني فهمت انو انا نسيت كل اشي من الخطة..اللي انا اصلا مش عارف شو هي..يعني هيك انا بكون التهيت

جبتلو الكرتونة فبلش هو يعملي 3 سندويشات خبز فرنسي..مجرد انو حط قطع الجاج اللي زي السمك بالخبز وابصر شو حط عليهم كمان..اعطاني السندويشات ملفوفات بقصدير.. انزويت هيك بمكان وبلشت ألغّ.......فعليا ازكى سندويشة دقتها بحياتي..ياااابي شو زاكية..شوي ولا هم الاسعاف والمطافي اجو..وتذكرت انو انا كان في خطة مفروض انفذها..بس لسه ضايل سندويشتين وانا مش رح اضحي فيهم بصراحة...طنشت الخطة كلها مع اني عارف انو افراد العصابة التانيين رح يطخوني لاني ما عملت المهمة

المهم نزلت زي الشطار بدي اشوف الاسعاف والمطافي شو بدهم يسوو وانا بكل برادة قاعد باكل بالسندويشات ولا الي خص....ولا هو بينزل من سيارة المطافي بني ادمين خارقين ع اساس..زي ما تقولو اكمن سوبرمان هيك

نزلو وبلشو يصيحو ع تاع المطعم المسخم اللي صار محبوس فوق ابصر ليش ومطلع راسو من الشباك برضو ابصر ليش...قال احنا اجانا اتصال انك عامل هيك هيك ومخرب ممتلكات دولة ومتاجر بممنوعات ووووو...إلخ

الزلمة بيحلف وبيعيط والله ما عملت اشي انا انتصب عليّ وانتو فاهمين غلط ومن هالحكي...ما ردو عليه وطخو عليه باسلحة غريبة بتطلع ضواو وليزر وتلج وعمدان كهربا..كسرو الدنيا وما خلو اشي وحملو حالهم وروحو

هون انا صحيت....خفان عقلي انو شو بالنسبة؟!؟!؟

بس خفان عقلي بزيادة لانو طعم السندويشة كان لسه معلق بحلقي..وتذكرت قديش كانت السندويشة من الاخر!!!...وهسه انا مش عارف من وين اجيب هالحج الصيني يعمللي جاج بالكاري زي اللي عمللي اياه بالحلم....

ياللأسف..!

العبرة من الحلم (على ما اعتقد)...اذا حلمت انك بموقف صعب لازم تختار فيه بين سندويشة زاكية وعملية نصب حساسة...سيبك من العملية واستمتع بالسندويشة...لانو غالبا افراد العصابة ما رح يلحقو يطخوك قبل ما تصحى

تصبحون على خير

BrainStorming 5

مساء الخير

مش عارف ليش حاس انو صارلي زماااااااان مش كاتب اشي..يمكن لانو فعليا هالحكي مزبوط

الفترة الماضية كانت عبارة عن امتحانات الفيرست + شغل بالمختبر عشان مشروع التخرج + فترة العيد وعطلتو وما صاحبه من شغلات ونوم بارقام قياسية

جد اني مشتاق للبلوغ..من زمان ما شيكت عالبلوغات اللي متابعها وعلقت هون ونهفت هون ومن هالجو...اللابتوب صارلو فترة منيحة مع صاحبي..غير انو النت كان معطل غير انو الجامعة الله يحرسها مختبر الانترنت فيها بدو واسطة عشان يفتح..هو بيفتح اول اسبوعين دوام..اول ما يبلش الفيرست والامتحانات خلص الواحد ما يحكي انو في عنا نت بالجامعة

ما علينا

الحمدلله الفترة الماضية انا والشبيبة اللي معي بالمشروع شدينا حالنا وخلصنا شغل المختبر..من صب عينات لكسر عينات لاحسب قيم لخود داتا..الحمدلله عدّت على خير وما ضل غير شغل الطباعة وهالخرابيط..وضل انو الواحد يبلش يدرس ويحفظ بالمشروع عشان يعرف شو بدو يسمع وقت المناقشة..المناقشات انشالله رح تبلش بأواخر شهر 12

بامتحانات الفيرست يعني ابدعت نسبيا..يعني في علامات عالافيريج..في اشي فوق الافيريج..في عندي علامة كاملة!!!..عند دكتور يعني مش ولابد...هالاشي من سنة اولى ما صار معي..بالمقابل في علامة اشي بيخزي وفي علامة تحت الافريج بنتفة...خير وبركة الحمدلله

على صعيد العيد...استغليت الفرصة لتجميع اكبر عدد من ساعات النوم..جد نمت قد ما بقدر..نمت بغباء..كنت اناااااااام واصحى اكمل النوم قد ما انا نعسان...اناااااااااام واصحى عشان ازبط نومتي....انااااااااااام واصحى عشان اقعدلي شوية عالتلفزيون عشان انعس وارجع انام.....الحلو بالموضوع انو زي اللي صار عندي تشبع...زي ما اكون مجمع ساعات نوم كفاية بحيث اني هالاسبوع عالرغم اني بالمرة مش هاضم مبدأ انو ارجع اداوم..عالرغم من هالاشي بصحى عالدوام بنشاط...وبقوم من الفراش بكل جرأة....برضو الحمدلله

بالمناسبة ما عيدت ع حدا الكترونياً في هالزحمة..سامحوني واقبلو كل عام وانتو بخير متأخرة جداً..حاولو تقبلوها قصدي

بالمناسبة التانية..بعتذر للناس اللي عملت كومنت وما رديت عليهم..اليوم تذكرتهم لما عملت ساين ان عالبلوغ...نأسف لازعاجكم نعمل لأجلكم

شو ضل اصعدة؟!...ولا اشي

اليوم تغديت بيض مع لحمة مفرومة وبصل وبقدونس!!!...يعني زي مبدأ العجة تقريباً بس جد من الاخر...الحمدلله

Over'n'Out

Open Your Eyes

A great song by SnowPatrol

Enjoy

All this feels strange and untrue
And I won't waste a minute without you
My bones ache, my skin feels cold
And I'm getting so tired and so old

The anger swells in my guts
And I won't feel these slices and cuts
I want so much to open your eyes
'Cause I need you to look into mine

Tell me that you'll open your eyes

Get up, get out, get away from these liars
'Cause they don't get your soul or your fire
Take my hand, knot your fingers through mine
And we'll walk from this dark room for the last time

Every minute from this minute now
We can do what we like anywhere
I want so much to open your eyes
'Cause I need you to look into mine

Tell me that you'll open your eyes

All this feels strange and untrue
And I won't waste a minute without you

Affection for Dinner

مساء الخير
مش عارف بصراحة احط اي مقدمة من اي نوع...فبالتالي عالسريع للمهم
من فترة صرت افكر بهالشغلة..انو طول عمرو الواحد اهم وجبة باليوم هي الغدا..عالاقل بالنسبة الي..من حيث انها غالبا بتكون طبخة..ولو مش طبخة بدها تكون مقالي ومتفرقات غالبا تؤكل ساخنة وغالبا فيها زيت قلي واشي من هالحكي

بس انو من فترة برضو صار وضع الدوام ما يسمحلي اروح ع وقت الغدا..يعني ما اخلص دوام قبل الخمسة..وطبعا بدك تحطلك ابو ساعتين مواصلات..ان وصلت بتوصل هلكان بتحط راسك وبتنام طب..

فاللي صار اني صرت اجي بدي اكل حوالي الساعة 9..ممكن تسخن وتاكل الغدا -في حال انو ضل منو اشي- بس اللي صار بالنسبة الي منطقي اكتر..اني اعمل عشا
بس هالعشا برضو منطقيا بدو يكون غير شكل..لانو بدو يعوض عن الغدا اللي راح...واحلى اشي بالعشا انك ممكن تشكل وتنوع من مليون صنف وخيار بمجرد انك تغير بشغلات بسيطة

يعني مثلا لو تيجي للصنف الاهم بالنسبة الي ع قائمة العشا الا وهو البيض
مكن تعملو مع فطر..وممكن مع جبنة مثلثات زي ما عادةً بعملو..ممكن مع سنيورة -فيما يسمى بنيوضة-..ممكن مع كتير شغلات تانية..
بلاش البيض..لو الواحد عندو شوية عسل او حلاوة او تطلي (تطلي يعني مربى..مش يعني تطرش او تدهن)..ممكن هالشغلات تتاكل مع زبدة..او مع قشطة..ويا حبذا لو الواحد عندو بالفريزر زبدة بيضا...

ممكن احكي امثلة اكتر من هيك بس الهدف انو ابين انو التنويع وارد جدا وسهل فيما يتعلق بوجبة العشا
بعدين بالنسبة للمشروبات عالعشا..هسه -برضو بالنسبة الي- ما بيلاقي الواحد اشي ينشرب عالغدا..يعني شوية مش منطقية انك تشرب بيبسي مع المنسف..او عصير موز مع الكبسة..وحتى لو صارت..بيكون الواحد ريقو ناشف ولا مضطر..ما ظنيت حدا بيحب الاكل يعملها

بس عالعشا..كاسة الشاي -المشروب الرسمي لوجبة العشا..مش هتحب حد قدها- تقريبا مع جميع اصناف العشا جائزة وواردة بالتواتر...وحتى كاسة الشاي ممكن الواحد ينوع بنكهاتها ما بين الميرمية والنعنع والهيل والقرفة وغيرو

على ألا يفهم من هالحكي اني ضد الغدا..انا بس بوضح الاختلافات بأساليب الادارة
بعتقد انو وصلت فكرتي...انا زلمة بحب اتعشا
ممكن هالبوست يبين شوي فايت بالحيط..بس مش عارف هادا اللي طلع معي
بكون ممنون الو اللي بيحكيلي ع شغلات ووصفات وطرق تانية للاستمتاع بالعشا
دامت الولائم حليفة دياركم العامرة

Peace out

I want to write about...

My recently-discovered LOVE.......wajbet el 3asha2!
A summary of this month's events and highlights...that would require a new BrainStorming post.
Post some really great songs I found recently.
Elections...You just can't ''not write'' about this!
Start 3 new Labels: One for the movies I watched, liked, hated...etc...One for the Tech-talk...another one for writing about the best things in life and the Blessings of Allah..

I really have a lot to write about.....But beside BEING So lazy..I'm just not that fluent these days !

Ultimate Late Homework !

I'm in a good mood...for some reason !..So I thought I could answer the comments and do some stuff here and there.

But....life Isn't just about chilling out and relaxing..Life is about commitments, responsibilities, HOMEWORKS !...Which brings The Mother Of Frogs to mind..See she told me that I've been tagged by her to do this homework.

1. Who sent you the invitation?

The Mother Of Frogs mentioned above..Because I have been ''blue'' and all..she meant it to be refreshing.

2. What are your favourite websites?

1. When I open Firefox I open 3 tabs for Hotmail, Facebook and my blog...From the blog tab I check out my blog list..I post a comment here and there sometimes.

2. I love collecting HQ wallpapers so I frequently download the new wallpapers from here. It's very cool to have so many different wallpapers, I use them for my slide-show screen saver.

3. Make Use Of : A very amusing site..I really like its way of presenting information. It leads you to a lot of useful sites. It also has a newsletter that you can subscribe to.

4. FXG's Demonoid account: Demonoid is one of the very few torrent sites that you can trust. FXG is a very trusted movie uploader. So I check it out from time to time to see if there is any good movies to download. This link won't probably be accessible if you're not subscribed to the site, subscription is not that simple, but maybe I can send you an invitation code if anybody is interested.

5. Ibda3world: I found it via The Mother Of Frogs herself. It really is very interesting and rich with information and amazing stuff.

I don't like newspapers websites. If there's something going on that is so important and I must know about then eventually I will.......So there u go..That was just an example of my bookmarks list. It actually is SO much longer. Its better if I just cut to the chase and post a photo of my bookmarks list

I won't tag anyone out of mercy and because I think almost everybody I know has been tagged.

That's it for tonight

Peace

Aisha

A very brilliant yet very simple tone by Armin Van Buuren

That's Art!

BrainStorming 4

صارلي فترة شهر وشوية ما كتبت اشي

مش معناها انو فش اشي ببالي..بس من فترة صرت احس حالي فاقد الاهتمام بكتير شغلات..اولها اشي اسمو انترنت

مش عارف بس قرفت الطلعة عغرفة السطوح..قرفت الشغلات اللي بالغرفة..قرفت التخت اللي بنام عليه..قرفت الكراسي..قرفت الغبرة..ومع موجة الغبرة..او بالاحرى التراب اللي مرت من كم يوم..كملت معي وجد طلعت الدار كلها من نفسي

بلش الدوام...بمعنى انو بلش الدوام..يعني كل يوم دوام وصحيان بدري ع اشي انتا بتكرهو وبتحقد عليه ولو عليك بتحرقو كلو مع استثنائات بسيطة لبعض الاشخاص والاماكن العزيزة..كل يوم بتروح ع محل بيخليك تشعر بالذنب مع كل خطوة بتمشيها فيه..ويا ريت هالمكان بينراح او بيتروح منو بسهولة..بدك حلم تدخلو وواسطة تطلع منو..عدد الطلاب في ازدياد غير منطقي..وعدد وسائل المواصلات في انخفاض مستمر..تقريبا اول يوم دوام خلصت عالـ3 ونص...وصلت البيت عالـ7 ونص !!..ما رحت بالهفترة ولا مشوار ولا ميلت ع حدا ولا قعدت بمطعم ولا قهوة...تقريبا ساعتين ونص وانا واقف بستنى بس ع الله ييجي باص.....بس اذا هيك مش مشكلة..المشكلة انو طول فترة هالوقفة بتكون اضطرارياَ بتسمع كلام الشباب التافه..الشباب اللي فش عندو اي تعريف لكلمة اخلاق او حيا او ترباية..عليم الله وصلت البيت بدي ادفن حالي

من ناحية اخرى عمالي بحس اني وصلت لمرحلة انا بحاجة فيها لاجازة..مع اني مليش اسبوعين طالع من اجازة..بس الاحداث اللي صارت معي والاجواء اللي عشتها خلال الاجازة الماضية كانت كفيلة باني اعيش تقريبا 4 اشهر من الفراغ اللي مش ممكن الواحد يستغلو باشي..ومن كمان ناحية زهقت اجواء البلد..وفيي حنين لايام زمان وصحاب زمان وعيشة زمان

عمالي بكئب حالي بزيادة وانا بكتب هالحكي..لانو من طول عمري بسمع صوت من جوا بيقوللي..طب بس اسكت واهدا وبلا كترة حكي..انتا احسن من غيرك.....على عيني وراسي..الحمدلله على كل شي..اللهم لا اعتراض على حكمك..انا بس بفضفض

بالمناسبة الشيء الوحيد اللي ما قرفتو بالانترنت هو اخبار الناس وبلوغات الناس الطيبة

عندي احساس اني رح احذف هالبوست بعد فترة

Peace Out

لـن أبـكـي

قصيدة من القصائد اللي درسناها بالتوجيهي للشاعرة الراحلة فدوى طوقان

ومن وقتها لحد الان والقصيدة كل شوية وشوية بتعن ع بالي وبتذكرها..مع اني تقريبا حافظها بس بحب اشوفها قدامي واقراها..لانو توزيعة السطور والكلمات بتذكرني بالزبط كيف كانت موجودة بكتاب العربي ايامها

اللي بتذكرو من حقائق عن هاي القصيدة..الشاعرة كتبتها كهدية لشعراء المقاومة اللي كانت على موعد معهم..وبالتالي الخطاب في القصيدة موجه لشعراء المقاومة...وكتبتها الشاعرة على نظام الشعر الحر..وعلى وزن مفاعِـلـَتـُن

على أبوابِ يافا يا أحِبائي
وفي فوضى حُطامِ الدُّورِ ، بين الرَّدْمِ والشَّوْكِ
وقفْتُ وقلتُ للعينين :
قِفا نبكِ
على أطلالِ مَنْ رحلوا وفاتوها
تُنادي مَنْ بناها الدارْ
وتَنعى مَنْ بناها الدارْ
وأنَّ القلبُ مُنسحقاً
وقال القلبُ :
(ما فَعَلَتْ بِكِ الأيامُ يا دارُ ؟
وأينَ القاطنونَ هُنا ؟
وهلْ جاءَتْكِ بعدَ النأي ، هل جاءَتْكِ أخبارُ ؟
هُنا كانوا ، هُنا حلموا
هُنا رَسموا مشاريعَ الغدِ الآتي
فأينَ الحُلْمُ والآتي ؟ وأيْنَ هُمُو ؟
وأيْنَ هُمُو ؟)
ولمْ ينطِقُ حُطامُ الدارْ
ولمْ ينطِقْ هُناك سوى غيابِهِمُو
وصمْت الصَّمْت والهِجرانْ
وكان هُناكَ جمعُ البومِ والأشباحِ
غريبَ الوجهِ واليدِ واللسانِ ، وكان
يُحوِّمُ في حواشيها
يمدُّ أُصُولَه فيها
وكانَ الآمِرَ الناهي
وكانَ ... وكانْ ...
وغُصَّ القلبُ بالأحزان

أحِبّائي :
مسحْتُ عنِ الجفونِ ضبابةَ الدمعِ الرَّماديَّة
لألقاكُمْ وفي عينيَّ نورُ الحبِّ والإيمان
بكُم ، بالأرضِ ، بالإنسانِ
فواخَلجي لَوَ اني جئتُ ألقاكُم
وجفني راعشٌ مبلول
وقلبي يائسٌ مخذول
وها أنا يا أحبَّائي هنا معكُم
لأقْبِسَ منكُمُ جَمْره
لآخُذَ يا مصابيحَ الدُّجى من زيْتِكُم قَطرةْ
لِمصباحي .

وها أنا يا أحبَّائي
إلى يدِكُم أمُدُّ يَدي
وعندَ روؤسِكُم ألقي هنا رأسي
وأرفعُ جبهتي معكُم إلى الشمسِ
وها أنتم كصخْرِ جبالِنا قُوَّة
وها أنتم كزهرِ بلادنا الحلوة
فكيفَ الجُرحُ يَسحقُني ؟
وكيفَ اليأسُ يَسحقُني ؟
وكيفَ أمامَكُم أبكي ؟
يميناً ، بعدَ هذا اليومِ لنْ أبكي .

أحبائي حصان الشعب جاوزَ كبوة الأمسِ
وهبَّ الشهمُ منتفضاً وراء النهرْ
أصيخوا ، ها حصان الشعب –
يصهلُ واثقَ النَّهمه
ويفلت من حصارِ النحسِ والعتمة
ويعدو نحو مرفأه على الشمسِ
وتلك مواكب الفرسان ملتمَّه
تباركه وتفديه
ومن ذوب العقيق ومنْ
دمِ المرجان تسقيهِ
ومن أشلائها علفاً
وفير الفيض تعطيهِ
وتهتف بالحصان الحرِّ :
عدواً يا – حصان الشعبْ
فأنت الرمز والبيرق
ونحن وراءك الفيلق
ولن يرتدَّ فينا المدُّ والغليانُ – والغضبْ
ولن ينداح في الميدان
فوق جباهنا التعبُ
ولن نرتاح ، لن نرتاح
حتى نطرد الأشباح
والغربان والظلمه

أحبائي مصابيحَ الدجى ، يا اخوتي في الجرحْ ...
ويا سرَّ الخميرة يا بذار القمحْ
يموت هنا ليعطينا
ويعطينا
ويعطينا
على طُرُقاتكم أمضي
وأزرع مثلكم قدميَّ في وطني
وفي أرضي
وأزرع مثلكم عينيَّ
في درب السَّنى والشمسْ

Ramadan

مساء الخير

اولاً كل عام وانتم بخير وانشالله بيكون هالشهر فاتحة خير عالجميع ويا رب يعيننا عالصلاة والصيام والطاعات ويبعدنا عن المسلسلات والتفاهات اللي رح تتعبى فيها شاشات التلفزيونات

صديقي العزيز ابو الإيك طلب مني اكتب شو بيعنيلي شهر رمضان..وفيما يلي..شو بيعنيلي شهر رمضان

اول اشي بيخطر ع بالي هي الجمعات..بفتح الجيم

بحب برمضان جو اجتماع الاخوة..الاقارب..جو العيلة بيكون احلى..واجتماعهم قبل الفطور وهم بيستنو صوت الاذان شعور جميل يبعث على الانتماء

ثانيا في عندك صلاة التراويح...اللي فعلا الواحد ما بيحس بطعم الشهر بدونها

كل شيء في صلاة التراويح بحبو..من توقيتها لطقوسها للسكينة البادية على الناس وهم بيصلوها...كل شي فيها رائع غير اصوات الولاد الصغار اللي مش لاقيين حدا يلمهم

ثالثاً..وشغلة مهمة جداً بحياتي..الا وهي العصائر

انا برمضان وبغيرو بعشق اشي اسمو عصير..اي اشي بطعم اي اشي زاكي بحب اشربو

بعيداً عن رمضان..بتدايق اذا فتحت الثلاجة وما لقيت فيها ولو عصير حل من ابو ال30 قرش..ولو صار وما لقيت قنينة عصير بجيب قنينة مي باردة وبضل ادلبع فيها لما تخلص

الشاهد بالموضوع انو برمضان بيتحقق اكتفائي الذاتي من العصير..من قمر الدين للكركديه للفيمتو للسوس والخروب والتمر الهندي الحمدلله بيخلص الشهر وانا مستهلك ما يقارب المترين مكعبين من العصير......غصبن عني بدي احب رمضان

غير هيك..بحب الدرس الديني القصير نوعا ما اللي بيحطوه قبل اذان الفجر..وبحب اذان الفجر..وبحب اجواء السحور وصوت المسحراتي

بحب اطلع عالسطوح بالليل واسرح بعمان وهي نايمة وغرقانة بالهدوء واضواء الزينة

كل الاجواء اللي بيجيبها هالشهر رائعة

وكعادتي..من ايام المدرسة..بعرفش اعمل خاتمة بنهاية الموضوع..بس انشالله اكون عملت الواجب المطلوب مني بشكل منيح

وكتتمة للواجب..بعمل تاغ لأم عمر...نمروطة اللي انشالله تلاقي وقت..ومس بطاطس..اللي برضو انشالله تقدر تحل الواجب

كل عام وانتم بخير

خير؟؟؟

مساء الخير

عالسريع هيك تعليق ع شغلة لفتت نظري امبارح

كنت اخر هالليل بقلب بالقنوات..من زمان ما تفرجت شو في عالتلفزيون
فلفتت نظري بقوة .. انو النايلسات صار بيحتوي على عدد هائل من القنوات الـ"دينية"...قنوات نصرانية تبشيرية..قنوات شيعية حدث ولا حرج..والادهى والانكى..قنوات لمذاهب ضالة مستحدثة...البهائية والقاديانية والاحمدية والصوفية وغيرها....

شو القصة؟؟..يعني ما بتذكر قبل سنة الشغلة كانت بهالوضوح وهالتنوع الكافر

!

Fracture

Warning:...Could get disgusting

''Fracture !''

بالزبط هيك وبصوت عالي حكاها الدكتور اللي عمللي صورة الاشعة

حكاها للدكتور اللي بعتني ع التصوير

مش عارف ليش ما حكالو: عندو كسر..انو بالعربي..بيجوز انو طب واضرب واطرح فانو متعودين عالعنجليزي بتعاملاتهم..بس الاحمتال التاني انو بدوش اياني اعرف..ع اساس انو مش ليل نهار بالهندسة بنحكي عالكسر والضعج وهالشغلات...ترا الدكاترة الهم بالعادة هيك ع اساس انو يحكو مع بعض تشفير...لما كان سيدي بالمستشفى وييجي الدكاترة بجولتهم ويربكبولو هادا الجلوكوز..بيصيرو يحكو بينهم بالانجليزي عشان ما حدا من اهل المريض او المريض نفسو يفهم

المهم انا بعدت الموضوع..الموضوع الاساسي هو الكسر اللي حدث امبارح بمشط رجلي اليسرى...واللي صار معي اليوم لما رحت اجبرها

صارلي تقريبا اسبوعين مشترك بصالة حديد..بس اخلص تمارين بروح باخد شاور بارد بنفس الصالة..طبعا هاي هي فترتي المفضلة من اليوم كلو كون الشاور مش طبيعي بالليل والبراد شو بيخلي الواحد ينعنش

المهم تحممت نعنشت وطلعت لقيت الجو بالشارع من الاخر فجد انشكحت لدرجة...لدرجة اني ما اتطلعت قدامي وانا بمشي عشان اشوف انو الرصيف اللي انا ماشي عليه شوي عالي..عالي لدرجة اني لما نزلت منو للشارع رجلي فكحت ولفت وما لقيت حالي غير وانا عالاربعة..طبعا كنت يومها لاعب تمارين ايدين وصدر وشاد ع حالي حبتين..من التعب ايدي خانوني وكمان هم فكحو وطبيت ع بوزي

طبعا خف عقلي من شغلة يا الله قديش كان مزاجي عدل..وقديش هسه نفسي احرق حالي

المهم الوالد وصلني عالــ"مستشفى" اللي بلاش ادعي عليها هسه...شافني الدكتور ولفلي اياها بشوية شاش وقلي بتراجع طبيب العظام بكرة..اللي هو اليوم....اللي هو هسه بدو يجي مربط الفرس

مربط الفرس بالموضوع انو قديش خف عقلي لما رحت اليوم اجبرها

فت عالمستشفى..فش هالازمة..بس في ريحة دخان !!..مش مشكلة..تقريبا ربع ساعة فتت ع دكتور العظام...شو اسمك يا ابني قديش عمرك وليش وقعت وليش صار معك هيك ومن هالسوالف..بعدين قللي فوت استنى بالغرفة اللي جوا...كأنو حكالي فوت شوف الفضايح اللي جوا

فتت جوه وقعدت عالتخت..جمبي في زي كومادينه..للي ما بيعرف الكومادينه فهي هاي الخزانة الصغيرة اللي بتكون ع جوانب التخت بغرفة النوم....كومادينه مفروش عليها جرايد وسخة..عالجرايد الوسخة مفروش بقايا زيت زتون..وهسهس...وفي كومة كبيرة خبز يابس..وابو طقم كامل فناجين قهوة وسخة..مع صحونها..وفي صحن فول ضايل فيه اكمن لقمة ما حدا استنضف ياكلهم..وجود الصحن بيفسر وجود بقع الزيت عالجريدة الوسخة...وفي كمان قزازة عصير ابو الـ35 ع منجا مخلصة والورقة والغطاية تبعتها ملفوفين ومدحوشين جوا القزازة نفسها...الخ الخ

اجت الـ"ممرضة" فتحت الدرج تاع الكومادينه..طالت منو كيس قهوة وطالت بكرج حجم عائلي وراحت...رجعت ومعها زي صحن ستينلس كبير فيه مية سخنة عشان التجبير..بقاع الصحن في زي اشي اخضر..زي اللي بيطلع عمواسير المية احيانا

فانا قاعد بستنى بالدكتور يخلص سواليفو مع اللي بره..بتطلع عليه ولا هو شغال تقوير بمناخيرو

المهم..دخل وجبرلي اياها وقللي بدها تقعد شهر بعدين بتيجي بتراجعني وبنفكها وهيك...الحلو هون انو التجبير مش زي تبع زمان هيك بتحسها عجينة ومليَّطة..هادا بيجي زي شاش عليه مادة بتنحط بالمية وبس تنشف بتصير يابسة...العاطل فيها انها مش من النوع اللي بينكتب عليه..يعني مش رح اقدر اخلي البني ادمين يوقعولي عليها..غير انو لونها تقريبا كحلي..يعني بالمرة مش رح اعرف اكتب عليها

وانا طالع بقوللو مش رح تعطيني عكاز ولا اشي اللي اعرف امشي عليها..قال روح بلا دلع يا زلمة..امشي عليها عادي بس ما تشدش..الممتع بالموضوع انو بيتنا طابق رابع..وفش مصعد

ضل شغلتين احكي عليهم..الصورة اللي بالبوست لقيتها عالنت يعني مش الصورة تاعتي..الحلو انو الكسر عندي بنفس المنطقة بس انو بالرجل اليسار

الاشي التاني انو هالشغلة اجت بوقت بالمرة ملوش داعي...يعني اليوم وبكرة وبعدو بيجوز عندي فيهم ابو 5 مشاوير من النوع المهم جدا دراسيا

الحمدلله على كل حال

Over'n'Out

An option...Well..maybe not !

Here's the thing....The last few days passed without me checking my email...facebook account...blog..the internet in general,,,and without watching a movie or any silly series on my laptop,,or even spending a lot of time organizing folders and trying new programmes...I spent the last few days without spending a minute in my room 5am5aming

See I locked it and I lost the keys...meanwhile..my family arrived from UAE...and then it happened...I forgot about the keys..about my room..my laptop..my internet\new world's technology addiction.....I actually spent the whole time hanging with my family...not that I don't hang with them...I just don't hang with them ''much''

So yesterday I realized that..and I thought:.I can give up being a geek??!?!...I can actually live without my routine???!!!...Not that I don't like being a geek..its just that I felt like I have another option..another lifestyle..I liked the idea and spent some time thinking about it..then I found my keys and I thought:..I should probably blog about this..and I was going to...this post's title was originally ''An option''........But...There i was...writing the title..it was then that I realized the other thing....I'm actually blogging it!!...I'm BLOGGING it ! How geek is that!?

Well...finally I realized this..I'm at peace with myself...I like being a geek..most of my friends are geeks..geek is better...I think that I had the option and that I already chose...being a geek !

لا تصالح

قصيدة رائعة للشاعر الراحل أمل دنقل

القصيدة بالقاء الشاعر..على ذمة اليوتيوب

لا تصالحْ!
..ولو منحوك الذهب
أترى حين أفقأ عينيك
ثم أثبت جوهرتين مكانهما..
هل ترى..؟
هي أشياء لا تشترى..:
ذكريات الطفولة بين أخيك وبينك،
حسُّكما - فجأةً - بالرجولةِ،
هذا الحياء الذي يكبت الشوق.. حين تعانقُهُ،
الصمتُ - مبتسمين - لتأنيب أمكما..
وكأنكما
ما تزالان طفلين!
تلك الطمأنينة الأبدية بينكما:
أنَّ سيفانِ سيفَكَ..
صوتانِ صوتَكَ
أنك إن متَّ:
للبيت ربٌّ
وللطفل أبْ
هل يصير دمي -بين عينيك- ماءً؟
أتنسى ردائي الملطَّخَ بالدماء..
تلبس -فوق دمائي- ثيابًا مطرَّزَةً بالقصب؟
إنها الحربُ!
قد تثقل القلبَ..
لكن خلفك عار العرب
لا تصالحْ..
ولا تتوخَّ الهرب!

لا تصالح على الدم.. حتى بدم!
لا تصالح! ولو قيل رأس برأسٍ
أكلُّ الرؤوس سواءٌ؟
أقلب الغريب كقلب أخيك؟!
أعيناه عينا أخيك؟!
وهل تتساوى يدٌ.. سيفها كان لك
بيدٍ سيفها أثْكَلك؟
سيقولون:
جئناك كي تحقن الدم..
جئناك. كن -يا أمير- الحكم
سيقولون:
ها نحن أبناء عم.
قل لهم: إنهم لم يراعوا العمومة فيمن هلك
واغرس السيفَ في جبهة الصحراء
إلى أن يجيب العدم
إنني كنت لك
فارسًا،
وأخًا،
وأبًا،
ومَلِك!

لا تصالح ..
ولو حرمتك الرقاد
صرخاتُ الندامة
وتذكَّر..
(إذا لان قلبك للنسوة اللابسات السواد ولأطفالهن الذين تخاصمهم الابتسامة)
أن بنتَ أخيك "اليمامة"
زهرةٌ تتسربل -في سنوات الصبا-
بثياب الحداد
كنتُ، إن عدتُ:
تعدو على دَرَجِ القصر،
تمسك ساقيَّ عند نزولي..
فأرفعها -وهي ضاحكةٌ-
فوق ظهر الجواد
ها هي الآن.. صامتةٌ
حرمتها يدُ الغدر:
من كلمات أبيها،
ارتداءِ الثياب الجديدةِ
من أن يكون لها -ذات يوم- أخٌ!
من أبٍ يتبسَّم في عرسها..
وتعود إليه إذا الزوجُ أغضبها..
وإذا زارها.. يتسابق أحفادُه نحو أحضانه،
لينالوا الهدايا..
ويلهوا بلحيته (وهو مستسلمٌ)
ويشدُّوا العمامة..
لا تصالح!
فما ذنب تلك اليمامة
لترى العشَّ محترقًا.. فجأةً،
وهي تجلس فوق الرماد؟!

لا تصالح
ولو توَّجوك بتاج الإمارة
كيف تخطو على جثة ابن أبيكَ..؟
وكيف تصير المليكَ..
على أوجهِ البهجة المستعارة؟
كيف تنظر في يد من صافحوك..
فلا تبصر الدم..
في كل كف؟
إن سهمًا أتاني من الخلف..
سوف يجيئك من ألف خلف
فالدم -الآن- صار وسامًا وشارة
لا تصالح،
ولو توَّجوك بتاج الإمارة
إن عرشَك: سيفٌ
وسيفك: زيفٌ
إذا لم تزنْ -بذؤابته- لحظاتِ الشرف
واستطبت- الترف

لا تصالح
ولو قال من مال عند الصدامْ
".. ما بنا طاقة لامتشاق الحسام.."
عندما يملأ الحق قلبك:
تندلع النار إن تتنفَّسْ
ولسانُ الخيانة يخرس
لا تصالح
ولو قيل ما قيل من كلمات السلام
كيف تستنشق الرئتان النسيم المدنَّس؟
كيف تنظر في عيني امرأة..
أنت تعرف أنك لا تستطيع حمايتها؟
كيف تصبح فارسها في الغرام؟
كيف ترجو غدًا.. لوليد ينام
-كيف تحلم أو تتغنى بمستقبلٍ لغلام
وهو يكبر -بين يديك- بقلب مُنكَّس؟
لا تصالح
ولا تقتسم مع من قتلوك الطعام
وارْوِ قلبك بالدم..
واروِ التراب المقدَّس..
واروِ أسلافَكَ الراقدين..
إلى أن تردَّ عليك العظام!

لا تصالح
ولو ناشدتك القبيلة
باسم حزن "الجليلة"
أن تسوق الدهاءَ
وتُبدي -لمن قصدوك- القبول
سيقولون:
ها أنت تطلب ثأرًا يطول
فخذ -الآن- ما تستطيع:
قليلاً من الحق..
في هذه السنوات القليلة
إنه ليس ثأرك وحدك،
لكنه ثأر جيلٍ فجيل
وغدًا..
سوف يولد من يلبس الدرع كاملةً،
يوقد النار شاملةً،
يطلب الثأرَ،
يستولد الحقَّ،
من أَضْلُع المستحيل
لا تصالح
ولو قيل إن التصالح حيلة
إنه الثأرُ
تبهتُ شعلته في الضلوع..
إذا ما توالت عليها الفصول..
ثم تبقى يد العار مرسومة (بأصابعها الخمس)
فوق الجباهِ الذليلة!

لا تصالحْ، ولو حذَّرتْك النجوم
ورمى لك كهَّانُها بالنبأ..
كنت أغفر لو أنني متُّ..
ما بين خيط الصواب وخيط الخطأ.
لم أكن غازيًا،
لم أكن أتسلل قرب مضاربهم
لم أمد يدًا لثمار الكروم
لم أمد يدًا لثمار الكروم
أرض بستانِهم لم أطأ
لم يصح قاتلي بي: "انتبه"!
كان يمشي معي..
ثم صافحني..
ثم سار قليلاً
ولكنه في الغصون اختبأ!
فجأةً:
ثقبتني قشعريرة بين ضلعين..
واهتزَّ قلبي -كفقاعة- وانفثأ!
وتحاملتُ، حتى احتملت على ساعديَّ
فرأيتُ: ابن عمي الزنيم
واقفًا يتشفَّى بوجه لئيم
لم يكن في يدي حربةٌ
أو سلاح قديم،
لم يكن غير غيظي الذي يتشكَّى الظمأ

لا تصالحُ..
إلى أن يعود الوجود لدورته الدائرة:
النجوم.. لميقاتها
والطيور.. لأصواتها
والرمال.. لذراتها
والقتيل لطفلته الناظرة
كل شيء تحطم في لحظة عابرة:
الصبا - بهجةُ الأهل - صوتُ الحصان - التعرفُ بالضيف - همهمةُ القلب حين يرى برعماً في الحديقة يذوي - الصلاةُ لكي ينزل المطر الموسميُّ - مراوغة القلب حين يرى طائر الموتِ
وهو يرفرف فوق المبارزة الكاسرة
كلُّ شيءٍ تحطَّم في نزوةٍ فاجرة
والذي اغتالني: ليس ربًا..
ليقتلني بمشيئته
ليس أنبل مني.. ليقتلني بسكينته
ليس أمهر مني.. ليقتلني باستدارتِهِ الماكرة
لا تصالحْ
فما الصلح إلا معاهدةٌ بين ندَّينْ..
(في شرف القلب)
لا تُنتقَصْ
والذي اغتالني مَحضُ لصْ
سرق الأرض من بين عينيَّ
والصمت يطلقُ ضحكته الساخرة!

لا تصالح
ولو وقفت ضد سيفك كل الشيوخ
والرجال التي ملأتها الشروخ
هؤلاء الذين تدلت عمائمهم فوق أعينهم
وسيوفهم العربية قد نسيت سنوات الشموخ
لا تصالح
فليس سوى أن تريد
أنت فارسُ هذا الزمان الوحيد
وسواك.. المسوخ!

لا تصالحْ
لا تصالحْ

بالمناسبة تدايقت وانا بعمل بالبوست..مع اني كنت اعرف كيف احط فيديو من اليوتيوب..بس مش عارف كيف فجاة نسيت..وبرضو مش عارف بالاخر كيف زبط معي

يا ريت اللي بيعرف وعندو طريقة سهلة وسريعة وما بتتضمن الاتش تي ام اخص يفيدني

نراكم

Back in the 3'orzeh

مساكم سعيد جميعا

الدنيا صيف والجو شبه بديع..فخليني احكي بشوية مواضيع

هو فعليا موضوع واحد...موضوع رجوعي للغرفة عالسطوح..او المخزن اللي عالسطوح

كوني بحب الاستقلالية والخمخمة لما اكون بشتغل بأي اشي..لجأت قبل تقريبا سنتين وشوية لشبه غرفة عنا عالسطوح محطوط فيها كل السجاد واللحفة والخماخم اللي اهل البناية مش عارفين وين يحطوها...بس كونها بعيدة عن العين بعيدة عن القلب بتضل قريبة وعزيزة علي

خلال مسيرة حياتي الممتدة زهاء العشرين ونيّف من الاعوام..تبينلي انو الشغلة اللي بتعاني معها وبتقرفك عيشتك هي اللي بيضل الواحد متذكرها وبيحبها

هاي الغرفة..الغرزة..الخم..أياً كان اسمها..حارة جدا في الصيف..باردة جدا في الشتاء...مغبرة وسريعة التوسخ على مدار العام حيث ان سقفها عبارة عن زينكو مش مشغول منيح..معرضة للسقوط ع راسي بأي لحظة لانها مش محمولة غير ع جكين والخشب اللي حامل الزينكو مهكع وتاكك من قد ما دلفت عليه مية بالشتا..مرتع للحشرات والقارص بالليل كون الدالية قريبة من شباكها

بس بنفس الوقت..في هاي الغرفة بس اقرر انام بنام عالسريع...لانو اصوات الجيران اللي ما بينامو ما بتصلها..انا ساكن زي ما تقولو بعشوائيات سكنية..صوت جاري وسواليفو لما يكون سهران بالحوش بيشرب كاسة الشاي مع جارو مسموعة تماما وفي منتهى الوضوح الشفافية للاربع طوابق اللي بتتكون منهم بنايتنا..بس ما بتصل للغرفة اللي عالسطوح...بتقصر

في هاي الغرفة العتمة مطلقة..بالليل بس انام وبدي ما اشوف ولا ضو يادوب اشوف ايدي..واحيانا لا ما يجيني نوم بطلع ع سطوحها بقعد وبدخنلي سيجارة وانا بتفرج على عمان وهي ساكنة وهادئة بدون اي صوت..وان كانت السما مغيمة والقمر يا دوب ينشاف أو ان كانت صافية والقمر منور..عالحالتين بتكون الاجواء ساحرة وبتكون القعدة احسن من ازعم قعدة او قهوة بعمان..عالاقل بالنسبة الي

هاي الغرفة..ياما اجو عليها صحابي بالجامعة..ياما اكلنا فيها معجنات..ياما حرقنا عالفوجيكا قشر بردقان واحنا فيها..ياما درسنا فيها الدراسة اللي قبل 3-4 ساعات قبل امتحان اخر الفصل

وبالتالي..شعور جميل اني ارجع انقل عفشي -تختي واللابتوب ومنافعهم- للغرفة..بالرغم انو هادا الصيف لا يبشر بدرجات حرارة مطمئنة..بيعين الله

نراكم

ويكيبيديا مصري

اليوم قاعد بتصفح بالويكيبيديا على مرض معين..فانو مكتوب عنو شغلات ومصطلحات طبية ومن هالحكي

فانا بالعادة عاليسار بيكون اللغات اللي متوفر فيها الموضوع..بحط بالعادة الماوس عالعربي بيطلعلي اللينك تحت بيكون مبين باللينك عنوان الصفحة اللي هو عنوان الموضوع..انو عالسريع بعرف معنى الشغلة اللي بقرا عنها بالعربي اذا كنت مش عارفو

بطلع الا هو في من ضمن اللغات..مصري..تفاجأت..لقيت في ويكيبيديا مستقلة بذاتها للغة المصرية..عأساس انها لغة مش لهجة..طبعا سيبك انها بتخزي وفش فيها غير كم موضوع اشي حكي فاضي

اللي دايقني انو ليش؟؟؟...يعني حتى لهون في عنصرة...ما بتلاقي صفحة ويكيبيديا للانجليزي الامريكي..ووحدة تانية للانجليزي الاسترالي ولا الايرلندي والاسكتلندي..مع انو في تباين واضح جدا باللهجات والمصطلحات المستخدمة في اللغة لما تحكي ع بلد زي امريكا واسكتلندا مثلا

لا وزي اللي عامل عملة وعارف حالو..لقيت صفحة كاملة انو زي تبرير ليش في اشي اسمو ويكيبيديا مصري..قال وحاطين اسباب واستفادات ومش عارف ايش...ويكيبيديا مصري هي موسوعة اي مصري يقدر يفهمها...يعني انو المصري هسه لما يقرأ "الان" ما بيستوعبها زي لما يقرأ "دلوقتي"...

يمكن الموضوع يبين تافه..بس الموضوع موضوع مبدأ..يعني ما في اشي اسمو لغة مصرية ولا لغة سورية ولا لغة خليجية...في اشي اسمو لغة عربية..وفي اشي اسمو لهجات ولكنات...ما حدا بيحكي عربي بحت هالايام..العربية موجودة بالقرآن الكريم..ويمكن في منها شوية بالشعر...عالاقل تضل اللغة موجودة بتعاملاتنا الرسمية..نعرف انو في اشي اسمو لغة عربية الكل مفروض يفهمها ويعرف يكتبها ويحكيها..مش كل بلد يصير يسمي لهجتو لغة مستقلة بحالها

BrainStorming 3

صارلي فترة ما كتبت اشي...وفعليا حاس انو من ضغط الفترة الماضية والضغط اللي لسه جاي عالطريق مش عارف اكتب اشي

ولا رح اكتب اشي

بلا برين ستورمينج بلا بطيخ ازرق

peace out

License

ول عليهم..اي عليم الله صرت بيجوز دافع 150 دينار على رخصة مش كاين اخدها

الله ربي..والله يا جماعة بسوق..وبشهادة المدرب والشباب صحابي..ليش بيضلو يرسبوني؟؟

قال التعامل مع عناصر المرور..هادا الغلط دايما بيحطلي دائرة عليه عأساس انو يعني هو اللي مرسبني

نفسي مرة من هالمرات اسال اللي فحصني شو هي هاي التعامل مع عناصر المرور ويجاوبني اشي منطقي..اشي بيقوللك المشاة ..طب فش مشاة..اشي بيقوللك اشارات السير..كلهم كم اشارة قف وبوقف عندهم وقوف تام.....اشي بيقوللك كل اشي عندك غلط..!!...الله اكبر عليك

اي عالدوار بعطي اولوية..عاللفات بكون حاطط تاني وماشي ع مسربي..عالمُري دايما بتطلع..ايدي ما بشيلها عن الستيرنج الا لما اغير الجير..حزام امان حاطين..بعطي غمازات ع كل لفة...طب شو بدك يعني اكتر من هيك؟؟؟؟

مرة واحد رفعلي ضغطي وهو بيفحصني..اكون ماشي عاليمين وماسك مسربي..بيقوللي امسك مسربك...اجي بدي احط تاني بيقوللي حط تاني..طب منا عارف وفش داعي تحكي..كل اشي عارفو واجي بدي اعملو يحكيلي عليه عأساس انو فهمان وبدو ينبهني...اخر اشي صار بيننا ططش قللي لف وارجع عالمركز..ورقة الرسوب كانت بانتظاري

اليوم...علي الحلال بدو يقعد يسوق عني..ماسك بهالستيرنج وبيلفلف فيه كاني مش موجود...بيركب الجير اللي بيعجبو..كان في قدامي باص بشارع لا يسمح بالتجاوز بتاتاً..ومش مستاهلة اصلا اني اتجاوز لانو معطي غماز يمين واعطيه 10 ثواني رح يختفي من الشارع..قال بيقوللي شد..اعطيني بنزين..شد شد!!...وك وين اروح؟؟؟

والله لو الفحص ببلاش..او مصاريه بعقل ما بزعل..بس مش منطق يعني كل ما بدي افحص احط ما مجموعو 10 نيرات..ولما اخد موعد جديد كمان 10 نيرات..يعني ابوي مش قاعد ع بنك..تقول ابوي عندو ابن غيري بالجامعة بيصرف عليه زيو زيي..فعليا صرت احس حالي حشرة قد ما بطلب من ابوي مصاري

وعلى سيرة الموعد الجديد...يعني اللي بيعطيني الموعد بيوصلي فكرة انو انا بعطيك الموعد من جيبتي..وعلى كيفي..بدي احطلك اياه بعد يومين اهلا وسهلا بعقلي..بدي أأجلك اياه شهر برضو انا ومزاجي..يعني ماشي عالقانون اللي بيريحني..طب يا ابن الحلال..عندي جامعة..عندي امتحانات..يا سلااااام..وينها هي الهاشمية ما هيها هون..بتخلص الفحص وبتضل طالع عالجامعة مش صعبة..طبعا سيبك من انو تقنعو انو دوامي من التسعة للخمسة..اكبر من انو يقتنع او يتفهم

مرة واقف عالدور بدي اخد موعد..في ختيار جاي مع ابنو بدو ياخد موعد لابنو..فعليا قاعد بيترجى..بالله عليك تحطلي اياه باليوم الفلاني..بقوللك والله عندو امتحان الولد..ابدا يا حج..بقدرش..لازم مدة قانونية بين كل فحص وفحص 16 يوم عالاقل..اجا واحد تاني..طلعلو الشرطي من جوا..اليوم الفلاني بينفعك؟؟..طب لو حطيتلك اياه كمان اسبوع بيزبط؟؟..قاعد بيخيرو وبيحيرو واطلب واتمنى..طبعا مهو معو واسطة

طبعا بيجوز واحد يحكيلك..يا زلمة عاااااااادي..اذا وقفت ع هيك مش مشكلة..في زي هيك واقطع مية مرة..مزبوط....بقدرش احكي غير مزبوط..هي كلمة بتذكر سمعتها من ابوي بالزمانات...عدل في هالدنيا ما في...العدل المطلق عند الله

ونعم بالله..تنشوف آخرتها..ودامت سياراتكم آمنة على الطرقات

مشاهدات من المناقشات

Be Advised:...This is probably gonna be an elongated gossip post!

نحن الان في الوقت المعين من الفصل اللي بتبدا فيه مناقشة طلاب مشاريع التخرج وبتبلش الحفلات والزفات والهيلمان في كل مكان

منا العين تعرف شو هو الهيلمان وليش بيكون معلق بشعرو وبيعونو

المهم

حابب انقل كمن صورة شفتها اليوم..اللي هو مبدئيا امبارح الخميس مش اليوم الجمعة

اول اشي كم هائل من الفرحة والزغاريت والرقص ع ابو جنب والخريجين يتطايرون كما اكياس البطاطا المليئة بالغبطة والحماس فوق جموع الاصدقاء والزملاء اللي بيزفوهم...جد اشي بيفرفح القلب

هسه انا والحمدلله ولا اعتراض على حكمو مش منهم..لكن صاحبهم وعالاقل زميلهم..صدقا اني فرحت باللي زفيناهم اليوم زي ما بفرح لاخوي..اثر فيي بشدة مشهدهم وهم طالعين من قاعة المناقشة ما لقو حالهم غير صارو عالكتاف وبين الجموع الغفيرة والكل قاعد بيرقص وبيخلع..اللي بيعرفهم واللي ما بيعرفهم..عليم الله انو بيجوز ربع الزفة مراقين طريق ولا عمرهم شافوهم..انا فعليا يعني ما بعرف كل الدفعة..مش صحبة قوية مع كل الدفعة..بس شعور انو واحد من دفعتك يتخرج وييجو دورو ينزف والله شعور جميل

ممكن من الناحية السوداء من العالم تبين انها لا هي حلوة ولا بطيخ مسوس..انو كيف يعني بدك تفرح وانتا شايف البني ادمين بيتخرجو وانتا قاعد مبحط بهالجامعة..يعني هم احسن منك,,,لا شك كنت بفكر انو هيك المفروض يصير..انغم واتدايق وادق في حالي..لكن الحمدلله المشاهد والجو كانت احلى من انو الواحد يتدايق

ايوااااا..هسه في كمن شغلة جد حطت عقلي بكف اللي جمبي..اشياء فعليا بتغم البال

اول اشي..هسه انا كنت ماسك الكاميرا وقاعد بصور ببحر البني ادمين اللي بيترحك قدامي..كنا اكمن واحد واقفين هيك ع مكان عالي شوي عشان التصوير يطلع كويس..طبعا عجقة وليخة ومحداش مفتح وين بيمشي..فصارو في بني ادمين يندزو علينا خلال الحركة والمشي والرقص..في شب جمبي قال شاف الوضع زي هيك كبرت براسو وزعل!!..وبلش يسبسب!!..ول عليكو مش هيك مالكو فتحو...انا بطلع فيه انا واللي جمبي..بعقلي بحكي هادا شو كان بيفكر؟؟..واللي جمبي رد هادا واحد تعبان!..بمخو..بس سمعتها عالطاير

تاني اشي..خلال الزف والرقص والاناشيد..في كم شب ماشالله عليهم صوت جهوري وكلامهم حلو..وفي كمان كمن شب عليهم صوت جهوري..بس كلام لا يصلح ينحكى بمكان عام..لما يكون الكل سامع..والكل بيصور..وفي بنات واهل بتتفرج ولازم تحشم الفاظك..مزبوط؟؟...يحيا ذكاءك

هسه اهم واخر اشي على ما ظنيت لانو جد بالغت بالاسترسال والاستقبال هالمرة.......ايام سنة تانية وتالتة كنا نشوف الزفات غير شكل..كان الشباب يفوتو مع اللي بدهم يناقشو عالقاعة..والاهل كمان يفوتو..اللي بدو يصور واللي بدو يشجع ويعمل ليخة بياخد راحتو..طلع قرار من الجامعة انو بس الطلاب اللي عليهم المناقشة يكونو جوا القاعة..المهم مش مشكلة بيخلص الخريج وبيطلع بيلاقي الاهل والمعجبين بيستنوه بره وبيزفوه ويادار ما دخلك حشرات

العقدة بالموضوع كالتالي..اليوم اللي هو امبارح..لما جيت اروح لقيت شب صاحبي برضو خريج لابس هالبدلة وواقف ع باب الجامعة..ايش ابو حميد شو اخبارك ايمتى مناقشتك..قال هسه..طب شو بتسوي واقف هون..قال بستنى اهلي عشان ادخلهم لانو الامن مش راضي يفوتهم عالجامعة

انا خف عقلي..قال هادا قرار جديد..ايام التخريج ممنوع حدا غير الطلاب يفوت عالجامعة..وكلية الهندسة اللي بتصير فيها كل هالخرابيط ما حدا بيفوتها الا طلاب الهندسة نفسهم.............انو يعني ليش؟؟؟؟؟

وكيف الام بدها تشوف ابنها وتفرح فيه وتتصور جمبو وهو لسه بعرقو؟؟..ول عليهم ول..طب انا بعرف الشب وبعرف انو عزابي واهلو سكان الامارات..يعني اجو من الامارات فعليا عشان يشوفو ابنهم بيتخرج..طب يعني هسه لو رئيس الجامعة ابنو تخرج بيضل واقف بره عند الباب يترجى انو يفوتوه؟؟..اي عليم الله ليفوت فرقتين بمنافعهم معو..الله لا يوفق اللي كان السبب..وانشالله بيلاقيها

على العموم..الله يوفق الخريجين ويفتح ع وجوههم سوق العمل..والله يعيننا عاللي جاي

محدثكم مش على بعضو

BrainStorming 2

This is probably gonna be a Multi-Language Post

Well..nothing particular to talk about..i just wanna express

The recent period of time has been another 3ajga..emotionally..physiologically and mentally

عجقة الجامعة تتصدر العناوين والمساحات كالعادة..قربت الفترة اللي ما بين السكند والفاينال..فترة قميئة وضيعة زنيخة بشكل عام تتخللها تجارب شعورية ممتعة أحيانا..جديرة بمكانة معينة في الذاكرة غالبا..متداخلة وكلها بتجر بعضها اكيد

بيبلش هسه تسليم البروجكتات..الاستعداد للفايناليات واعادة الحسابات بالنسبة لمختلف المواد

مممم..اليوم تكررت معي حادثة اليمة وهي انو تفوت عالامتحان تكون يعني ناوي تحل كل اشي..بس للاسف بتتفاجأ بواقع مش ولابد..على الرغم من انو الحق هالمرة والحق يقال مش عالدكتور..الدكتور محترم وانا بحترمو لدرجة,,لكن سبحان الله تجري الرياح بما ولا حدا كان معتقد

المهم....فعلياً..وبشكل ملموس نوعا ماء..دخل الواحد بمرحلة الوعي عالتعلم..يعني..كل يوم بيتعلم اشي جديد..بالحياة..بالدراسة..بالبني ادمين..وبيكون فعليا عارف انو اليوم صار معي كذا وكذا وهالاشي كشفلي كذا وكذا وبالتالي بيبني عليه اتجاهات واعتقادات معينة..والحمدلله اللي الواحد الله بيسخرلو المواقف والاحداث اللي تنورو وتخليه مصمصح اكتر عالدنيا حواليه

The above 5arabeet are a little bit too much less than what i really meant to say..or write..but since this post has been interrupted by a visit of a very dear and missed friend of mine..i'll call it a day.

Slow It Down

One of my favorites

It's very relaxing..I think !

A Shattered Dream

يعني فوق ما هو الامتحان مادتو طويلة وزرنيخة

وجاي بين طحشة امتحانات ومشاريع من الاخر

ومنظر وترتيب وديكور ورقة الاسئلة اشي بيخلي الواحد يستفرغ

وفوق مهي اسئلتو كل واحد بدو صفنة ربع ساعة عشان تخلص قرائتو..والامتحان كلو ع بعضو 40 دقيقة

وفوق ما القاعة مرصوصة طلاب زي المجدوس والدنيا حر وانت مش راضي تشغل المراوح

وفوق ما انت دكتور ناقص ودقر ونسونجي ومش قد كلمتك

وفوق كل هالاشي..بتجيلبي ورقة الاسئلة مكبسة مع دفتر الاجابة بطريقة بشعة تخليني مش عارف لا انقل القيم ولا اتفرج ع الرسمات ولا بطيخ البين يطس وجهك

وبس افصل الورقتين عن بعض بتيجي وبكل حقارة ترجع تكبسلي اياهم...عشر كبسات!؟

يعني انا كيف احل ؟!؟!؟

أي انا داخل عالامتحان ومكيف ومبسوط اني دارس ومخلص وشبعان نوم وناوي اجيب علامة كاملة!!!..أي عليم الله اول ربع ساعة مرت وانا مش عارف شو اكتب..ولا وين اكتب..ومش عارف كيف بدي اسلم الورقة فاضية

يعني ليش هيك؟؟؟؟.......طب هيك ليش؟؟؟

عزائي الوحيد انو مش لحالي اللي خف عقلو..معظم أعظام الشعبة خفت ضبنات مخها..والموت مع الجماعة رحمة

منك لله يا مفتري

Corrupted

هي نوعا ما قبعت..وما عادت تتلزق

يلعن الشيطان..مش هيييييك..بطل في اشي منيح في هالدنيا

مجرد موقف بدي احكيه ويمكن اعقب عليه

ابن عمي علي الله يسهل عليه بالسويد..طلع من الاردن لسبب رئيسي..انو كانت العيلة مقززتو ومطلعتو من اواعيه

كان بس يقعد بغرفتو عالسطوح ويكون معصب بسبب هالشغلة اطلعلو اهدّيه

والله ما بدهم الا مصلحتك..مستحيل انو يكونو بيحكو هالحكي الا عشان مصلحتك ومن هالحكي....كان يحكيلي انتا جديد عالبلد ولسه مش صاحي عالدنيا بالمرة..مستحيل يكون فلان الفلاني بدو مصلحتي,,والله بيكرهني ولا بيطيق الارض اللي بمشي عليها

كنت استغرب انو مش لهالدرجة الواحد بتنقلب عندو المفاهيم وبيقتنع انو اهلو ماشيين ضدو...بس حاليا اجاني كلامو

اقتنعت كلياً انو الدنيا وصلت فيها مراحل الخراب لجوه الأسر والعيل..بطلت كلمة القرابة تعني اي اشي بالنسبة للعالم..وانا اولهم

وفعلا زي ما كان يحكي علي..لما فلان الفلاني حكا هالكلمة...ابدا لا يمكن اقتنع انو كان قاصد مصلحتي فيها

على البطيخ السلام

A New Crappy ''Theme''

I'm too tired to elaborate
...
I need to eat and sleep

النائمة في الشارع

تم افتتاح ليبل جديد متخصص بالقصائد والاشعار اللي قرأتها وأعجبتني

وحدة من اروع القصائد اللي بعرفها قصيدة النائمة في الشارع أو الطفلة البائسة..للشاعرة العراقية المرحومة نازك الملائكة
كانت بكتاب العربي تاع التوجيهي..كانت مقررة ع جماعة الادبي..بس انا قرأتها ومن يومها وانا معجب بهالقصيدة
انشالله تعجبكو

في الكرّدة , في ليلة أمطار ورياح

والظلمة سقف مدّ وستر ليس يزاح

انتصف الليل وملء الظلمة أمطار

وسكون رطب يصرخ فيه الإعصار

الشارع مهجور تعول فيه الريح

تتوجّع أعمدة وتنوح مصابيح

والحارس يعبر جهما مرتعد الخطوات

يكشفه البرق وتحجب هيكله الظلمات

ليل يجرفه السيل وينهشه البرد

تنتفض الظلمة فيه ويرتعش الرعد

***

في منعطف الشارع , في ركن مقرور

حرست ظلمته شرفة بيت مهجور

كان البرق يمرّ ويكشف جسم صبيه

رقدت يلسعها سوط الريح الشتويه

الإحدى عشرة ناطقة في خدّيها

في رقة هيكلها وبراءة عينيها

رقدت فوق رخام الأرصفة الثلجيّه

تعول حول كراها ريح تشرينيّه

ضمّت كفّيها في جزع في إعياء

وتوسّدت الأرض الرطبة دون غطاء

لا تغفو , لا تغفل عن إعوال الرّعد

والحمّى تلهب هيكلها ويد السّهد

ظمأى , ظمأى للنوم ولكن لا نوما

ماذا تنسى ؟ ألبرد ؟ الجوع ؟ أم الحمّى

ألم يبقى ينهش , لا يرحم مخلبه

السّهد يضاعفه والحمّى تلهبه

نار الحمّى تلهمها صورا وحشيّه

أشباح تركض , صيحات شيطانّيه

عبثا تخفي عينيها وسدى لا تنظر

الظلمة لا تدري , والحمّى لا تشعر

وتظلّ الطفلة راعشة حتى الفجر

حتى يخبو الإعصار ولا أحد يدري

***

أيّام طفولتها مرّت في الأحزان

تشريد , جوع , أعوام من حرمان

إحدى عشرة كانت حزنا لا ينطفىء

والطفلة جوع أزلي , تعب , ظمأ

ولمن تشكو ؟ لا أحد ينصت أو يعنى

البشرية لفظ لا يسكنه معنى

والناس قناع مصطنع اللون كذوب

خلف وداعته اختبأ الحقد المشبوب

والمجتمع البشري صريع رؤى وكؤوس

والرحمة تبقى لفظا يقرأ في القاموس

ونيام في الشارع يبقون بلا مأوى

لا حمّى تشفع عند الناس ولا شكوى

هذا الظلم المتوحّش باسم المدنيّه ,

باسم الإحساس , فواخجل الإنسانيه

! ! !

امبارح كنت طالع بالسرفيس

الشوفير كان حاط على روتانا على ما ظنيت

المهم كان المقدم لبنيني مايع..وبتلقى اتصلات من "عيال حبيبة" وعأساس انهم بيفضفضو وهو عأساس بيعطيهم رأيو المهم بخصوص حل مشاكلهم

ما كنت مركز مع البرنامج اولها..ما وعيت الا كأنو اللي بيتصل كاين بيحب بوحدة لمدة سبع سنين..وكأنو بهالمدة خطبها اكتر من مرة بس ابصر كأنو تفركشت لاسباب مش عارف شو هي

المهم بالاخر تركتو..وخطبت..وتجوزت صارلها كانو 4 سنين..وصار عندها بنت..والاخ لسه بيحبها..وعاتصال معها !!..ولسه عندو امل انو يعمل اشي يطلقها من زوجها وبعديها يتجوزها..مع انو حاليا "بيحكي مع اربع خمس بنات" بس ولا وحدة انو معبية عينو

المشكلة مش هون..المشكلة انو المذيع بيناقشو..بتحبها؟..طب ممكن تتجوزها بعد ما تتطلق؟؟..طب منتا عارف انها مجوّزة وعندها بنت مو حرام عليك؟؟..بكل برود اعصاب..مش انو يستغرب ويخف عقلو ويعصب ويقوللو هالحكي ما بيصير وما في عاقل بيعمل عمايلك.........طب بلاش

بعديها قعد المذيع يقرا مسجات ويجاوب عليها

وحدة بتقوللك "انا بحب زوج اختي..زوج اختي هو اللي بلش وقلي انو بيحبني..بلييز ساعدني"..كان نفسي فجأة يتغير المذيع ويصير محلو محمد الوكيل..تخيلت انو رح يصير يخربط بالحكي ويطرطق لاهلهم

العبرة بالموضوع..مش عارف ليش حاس انو المفروض ما يكون في برامج راديو ولا تلفزيون تحكي بشغلات زي هيك

مش عارف ليش

على اي حال .. عندي مشروع تصميم لسه ما بلشت فيه

الى لقاءٍ قريب

سوء النية

مش عارف ليش..بس كمية هائلة من البني ادمين اللي الواحد بيشوفهم وبيعرفهم عندهم قاعدة تقديم سوء النية على حسن النية هي الماشية

يمكن انو كتير انقرصو بحياتهم وبطل في اشي اسمو ثقة أو طيبة او براءة

المشكلة انو حتى لو انقرصو او انو شايفين كتير بحياتهم..برضو الواحد كتير بيتعرض لمواقف..من برا لبرا..انو بيشوف حالة من حالات تقديم سوء النية وبيتنكس بالاخر لانو بيكون عند الطرف الاخر عذر وسبب مقنع مثلا..يعني بتلاقيه بس يعرف السبب ويبطل العجب بيقلب حشرة..كيف بعد شغلات زي هيك الواحد ما بيتعلم وبيقول انو والله عشان ما احرج حالي كمان مرة مش رح اظن ظن السوء!؟

بالنسبة الي بقدرش اتقبلها..بحب اكون "مش عارف" او مش متاكد احسن ما اجزم بالاشي العاطل واطلع بالاخر غلطان

ما علينا..تذكرت ورقة كان ابوي معلقها ع خرانتو اللي بالمدرسة

كان مكتوب عليها ..قاع الاشياء المقلوبة قمة

خليها على الله

شيخ...رجل صالح

انا بدي افهم

مين المفروض يتسمى شيخ؟؟..او رجل صالح؟؟

هل هو الشخص اللي معروف من طول عمرو وهو من اهل المسجد وروادو..واللي جارو بيأمنو..واللي إلو وقفات مشهودة بمواقف صعبة..واللي الكل بيعتبرو قدوة لولادو وبيحاول يخليهم يقلدوه..واللي بيكون خير لنفسه ولأهلو وللناس اللي حواليه

ولا لقب شيخ لقب ديني مش لازم الواحد يتهاون فيه ويتهاون لمين يحكيه

طب هل كل من ربى لحية صار شيخ..هل كل من صلى شهر بالجامع شيخ..هل البني آدم الصايع الضايع اللي بيكون (وبكل فخر) طول عمرو تاع شرب وحشيش ونسوان...وجايب المشاكل لاهلو ولكل واحد بيعرفو...وحكيو تافه وسطحي ولا مبالي..وما بيحترم كبير ولا بيعطف ع صغير..ووجهات نظرو فاسدة ومسمومة..وعقلو وتفكيرو تفكير ولد فعفوط ملعّب وهو من طولو ما بيفوت من الباب....هل هالبني آدم لو ربى لحية وقعدلو شهر ولا شهرين يصلي بالمسجد ولبس سروال ودشداشة وطقية وحط مسواك بتمو..هل بيكون الله هداه وبيكون صار شيخ؟؟

اللي الله هداه بيكون هداه لبر اهلو وكبار عيلتو

اللي الله هداه بيحترم الدين اللي ربنا هداه لسبيلو

اللي الله هداه ما بيفتي عالطالع والنازل..وبيبعد عن البدع والشبهات وبيخلي الفتوى لاهلها

اللي الله هداه ما بيحاول يشبك بين اطراف العيلة ويدخل الحابل بالنابل..الله ما بيهدي الواحد يعمل فتنة

اللي الله هداه بيحاول يغير من طبايعو المش ولا بد عشان تتماشى اخلاقو مع روحتو عالمسجد

وبيقوللك ليش الناس بتحكي عالـ"شيوخ" وليش في بعض الناس بيهرب من اشي اسمو لحية

حسبي الله ونعم الوكيل

Brain§torming 101

مش عارف

جاي ع بالي اشبعر بأي اشي..اي اشي ..فعلياً أي اشي

مش الموضوع موضوع انو عندي كتير آراء مهمة ورح تغير مجرى الامور في الشارع العربي..ولا موضوع اصلاح ولا ولا ولا..الموضوع موضوع شعبرة

يعني حتى هو كشعور صعب أوصفو..حتى انا مش عارف شو بدي

تتزامن في الفترة الحالية احداث كثيرة متداخلة..من تحسن اوضاع سيدي الصحية الى قرب سفر الوالد الى قرب قرب سفر الوالدة مع سعد القطروز الى بداية فصل جديد بالجامعة..الى سخط وغضب من التخت العتيد بسبب سقوط احدى الركائز الاربعة الحامل لوزنه ووزني..الى امتعاض نسبي من الاوضاع الجوية اللي بالنسبة الي مربكة مشقلبة..بالاجواء اللي زي هيك بتصيبني حالة غريبة من التجمد الشديد المصحوب بتعرق مبالغ فيه..الموضوع موضع قرف بحت

صارت تيجي الغربة ع بالي هاليومين..صرت احن للغربة..مش راكبة انا عارف..بس من طول عمري كان نفسي اتغرب بمكان ما بعرف فيه حدا..وجهة الانظار والحلوق كانت دائما وابدا انجلترا..بحكم اني بحب اللغة الانجليزية وبمشي حالي فيها..ولما كنت زمان احضر مباريات بالدوري الانجليزي كان يخف عقلي قديش يكون الملعب نضيف وكيف لما تصير فرصة ولا حركة حلوة الكل بيصير يزقف بطريقة قمة في قلة الزوق

الفكرة اني حاب اشوف شو رح اسوي وشو رح يكون وضعي لما اكون لحالي بدون اي تدخل او مساعدة..الفكرة الاهم اني بني ادم شغل هدوء وخمول واجواء غريبة من الانعزال الفوضوي والخصوصية..الغربة هي الحل الامثل لاكتشاف الذات

هيه والله هيه والله

المهم

بكرة امتحان السواقة العملي..المفروض يصير التالي

(هذا والله اعلم)

في 4 دنانير و75 قرش بدهم يندفعو قبل الامتحان

ان نجحت بدي بعد الامتحان اروح ادفع 30 دينار..ان لا سمح الله رسبت بدي اروح ادفع 10 عشان اخد موعد اخر

كل الامل اني ادفع 30 دينار

غريبة الناس

:JZ hat:

دنيا

سقا الله أيام التوجيهي

كان صفنا حوالي 25 طالب..معظمهم من (الزلمات) ..اللي هم اهل الاردن وفلسطين وسوريا..كان في واحد (زول) وكم واحد تاني من جنسيات متفرقة

المهم كنا كلنا ع بعض صحاب..إيد وحدة في كل اشي..نفس الهم..نفس التفكير..نفس العادات والتقاليد..متشابهين في معظم الشغلات

كان في واحد من هالشباب اسمو رماح..سوري..ما كان كتير محبوب بين الشلة

كنت احس انو ما حدا فاهمو ولا حدا بيسمعلو..بس كان لما بدو حدا يساندو باشي يجيني..كنت احب اسمعلو لاني كنت احس اني من نفس الفصيلة..انو ما حدا فاهم علينا..المهم تطورت علاقتنا ايام التوجيهي وصرنا دايما مع بعض

خلص التوجيهي..كل واحد طلعت نتيجتو وكل واحد صار يفكر بمستقبلو..وراح كل واحد في طريق..بعد ما استقرينا وكل واحد صار بدنيا صار الواحد يسأل..وين راحت الدنيا بهالناس..وين صار محمد ووين صار محمود وشو بيدرس ناصر..تقريبا خلال فترة اول سنتين جامعة كان الكل ع اتصال مع الكل..الا رماح..ضليت اسال عنو ووين صار ووين راح لكن عبث..ما حدا بعد التوجيهي شافو

قبل فترة وصلني خبر من شب بالامارات انو عرف انو رماح في سوريا وبيشتغل مع ابوه بسوبرماركت..اعطاني رقم تلفون..حاولت اتصل فيه بس برضو ما قدرت اوصلو او احكي معو

اليوم الصبح وصلني خبر وفاة صديقي رماح في سوريا

مش عارف شو احكي غير هيك

الله يرحمك يا رماح ويحسن اليك..كنت صديقي وغالي جداً علي

إنا لله وإنا إليه راجعون

لا أراكم الله مكروهاً بعزيز

6abaziat