Back in the 3'orzeh
مساكم سعيد جميعا
الدنيا صيف والجو شبه بديع..فخليني احكي بشوية مواضيع
هو فعليا موضوع واحد...موضوع رجوعي للغرفة عالسطوح..او المخزن اللي عالسطوح
كوني بحب الاستقلالية والخمخمة لما اكون بشتغل بأي اشي..لجأت قبل تقريبا سنتين وشوية لشبه غرفة عنا عالسطوح محطوط فيها كل السجاد واللحفة والخماخم اللي اهل البناية مش عارفين وين يحطوها...بس كونها بعيدة عن العين بعيدة عن القلب بتضل قريبة وعزيزة علي
خلال مسيرة حياتي الممتدة زهاء العشرين ونيّف من الاعوام..تبينلي انو الشغلة اللي بتعاني معها وبتقرفك عيشتك هي اللي بيضل الواحد متذكرها وبيحبها
هاي الغرفة..الغرزة..الخم..أياً كان اسمها..حارة جدا في الصيف..باردة جدا في الشتاء...مغبرة وسريعة التوسخ على مدار العام حيث ان سقفها عبارة عن زينكو مش مشغول منيح..معرضة للسقوط ع راسي بأي لحظة لانها مش محمولة غير ع جكين والخشب اللي حامل الزينكو مهكع وتاكك من قد ما دلفت عليه مية بالشتا..مرتع للحشرات والقارص بالليل كون الدالية قريبة من شباكها
بس بنفس الوقت..في هاي الغرفة بس اقرر انام بنام عالسريع...لانو اصوات الجيران اللي ما بينامو ما بتصلها..انا ساكن زي ما تقولو بعشوائيات سكنية..صوت جاري وسواليفو لما يكون سهران بالحوش بيشرب كاسة الشاي مع جارو مسموعة تماما وفي منتهى الوضوح الشفافية للاربع طوابق اللي بتتكون منهم بنايتنا..بس ما بتصل للغرفة اللي عالسطوح...بتقصر
في هاي الغرفة العتمة مطلقة..بالليل بس انام وبدي ما اشوف ولا ضو يادوب اشوف ايدي..واحيانا لا ما يجيني نوم بطلع ع سطوحها بقعد وبدخنلي سيجارة وانا بتفرج على عمان وهي ساكنة وهادئة بدون اي صوت..وان كانت السما مغيمة والقمر يا دوب ينشاف أو ان كانت صافية والقمر منور..عالحالتين بتكون الاجواء ساحرة وبتكون القعدة احسن من ازعم قعدة او قهوة بعمان..عالاقل بالنسبة الي
هاي الغرفة..ياما اجو عليها صحابي بالجامعة..ياما اكلنا فيها معجنات..ياما حرقنا
عالفوجيكا قشر بردقان واحنا فيها..ياما درسنا فيها الدراسة اللي قبل 3-4
ساعات قبل امتحان اخر الفصل
وبالتالي..شعور جميل اني ارجع انقل عفشي -تختي واللابتوب ومنافعهم- للغرفة..بالرغم انو هادا الصيف لا يبشر بدرجات حرارة مطمئنة..بيعين الله
نراكم
oh good god!fe 7ada '3er mama fel 3alam be3raf kelmet "mhakke3" :woops:
i had started thinking she invented it..
anyway,this is nice i enjoyed reading,u have this way of telling things and they come out so funny lol
and btw i too have my little place where i disconnect from the world some times :)))
مع انك كتبت البوست بلغة بسيطة
بس حسيت انك بتحكي من كل قلبك عن هالغرفة
على قولتك آي لايك
;)
أي شو هالرومانسية هاي
:سمايلي بدقك بكوع إيده:
شو القصة أبو الشباب
Rain
اشكر تشجيعك..يسعدني انو الحكي اعجبك
مهكع كلمة لا غنى عنها للدلالة على الخراب الشديد
لونار
كنت في وضعية آي لايك شديدة للغرفة وقتها
هلا عمي
مخطارنا
:سمايلي صار لونو ازرق من الخجل..ع اساس:
فش قصة ولا بطيخ..انا رومانسي وكل حاجة بس مدكن
بتزكرني ف ايام شبابي
لوووووووووول
كان عندي غرفه متل هاي بالزبط
امي كانت عاملاها للغسيل
بس طحيتها منها
وإخدتها وعملتها ملجئ للصبايا
الفرق الوحيد إنه خليت ابوي يصب السقف ماكانت زينكو
تحياتي عمو
حيالله ام عمر
هو فعلا اذا بتنعقد بتصير يا محلاها..بلكي عن قريب
بيضل علي بس حمام ومطبخ وحوض جاكوزي
وخط نت محترم..ولابتوب زي البني ادمين..الله كريم
هلا عمي
الذكريات الحلوه دائماً هيه إلي بتحلي المكان وبتخليه عزيز وإلو مكانة غير :)
Rula A.
مزبوط الغرفة مليانة ذكريات واحداث عشان هيك كتبت فيها كل هالغزل
نورتي البلوغ..اهلا وسهلا
I love this post , and I want such a place too!
This is what i thought when i read your best post (as i found it.)
a late hello but Salam , nice to meet you :)