دنيا





 سقا الله أيام التوجيهي

كان صفنا حوالي 25 طالب..معظمهم من (الزلمات) ..اللي هم اهل الاردن وفلسطين وسوريا..كان في واحد (زول) وكم واحد تاني من جنسيات متفرقة

المهم كنا كلنا ع بعض صحاب..إيد وحدة في كل اشي..نفس الهم..نفس التفكير..نفس العادات والتقاليد..متشابهين في معظم الشغلات

كان في واحد من هالشباب اسمو رماح..سوري..ما كان كتير محبوب بين الشلة

كنت احس انو ما حدا فاهمو ولا حدا بيسمعلو..بس كان لما بدو حدا يساندو باشي يجيني..كنت احب اسمعلو لاني كنت احس اني من نفس الفصيلة..انو ما حدا فاهم علينا..المهم تطورت علاقتنا ايام التوجيهي وصرنا دايما مع بعض

خلص التوجيهي..كل واحد طلعت نتيجتو وكل واحد صار يفكر بمستقبلو..وراح كل واحد في طريق..بعد ما استقرينا وكل واحد صار بدنيا صار الواحد يسأل..وين راحت الدنيا بهالناس..وين صار محمد ووين صار محمود وشو بيدرس ناصر..تقريبا خلال فترة اول سنتين جامعة كان الكل ع اتصال مع الكل..الا رماح..ضليت اسال عنو ووين صار ووين راح لكن عبث..ما حدا بعد التوجيهي شافو

قبل فترة وصلني خبر من شب بالامارات انو عرف انو رماح في سوريا وبيشتغل مع ابوه بسوبرماركت..اعطاني رقم تلفون..حاولت اتصل فيه بس برضو ما قدرت اوصلو او احكي معو



اليوم الصبح وصلني خبر وفاة صديقي رماح في سوريا
مش عارف شو احكي غير هيك

الله يرحمك يا رماح ويحسن اليك..كنت صديقي وغالي جداً علي
إنا لله وإنا إليه راجعون

لا أراكم الله مكروهاً بعزيز



Equilibrium








http://soilerosion.net/image/raindrop.jpg

صباح الخير


قاعد لحالي بغرفتي العتيدة عالسطوح

مستمتع وممتعض بنفس الوقت

مستمتع بالشتا وصوت حبات المطر على السقف الزينكو

ممتعض من صوت حبات المطر وهي بتخترق هالسقف المسخم وبتنزل بالسطل اللي حاطو تحت المنطقة اللي بيحدث فيها الدلف

بس الحلو بالموضوع انو الجو مش بارد..او اني تمسحت وبطلت احس بالبرد من كتر ما بقعد بالبرد

على اي حال..بدي اطلع كمان شوية عالترخيص عشان اخد موعد جديد للامتحان العملي تاع السواقة

لا..ما رسبت المرة الاولى..بس ما قدرت اروح امتحن عشان الفصل الخرافي الآنف ذكرو ما خلاني افضى اروح امتحن

سنح الجامعة وسنينها


نراكم

:/






End Of An Era







صبح صبح حسب التوقيت المحلي والارتفاع الميتافيزيقي عن سطح البحر


الحمد لله على هالنعمة..خلص الفصل

جاي ع بالي افيع وما اخلي اشي بنفسي..حاس حالي مخلص توجيهي


:rgs:


صحيح هي العطلة كلها ع بعضها ما بتصمد الشهر..لكن انشالله اخوي الفصيعون جاي من الامارات..المسكين توجيعي ومخنوق..دعواتكم له بالتوفيق

المهم فهالفصيعين جاي يقضي اجازتو هون وبالتالي رح الاقي حدا ازنخ عليه ويزنخ علي بحكم انو كل صحابي سافرو

حاليا نعسان وجيعان والغرفة من حولي زي مكب النفايات..بالتالي فرصة سانحة اني اقوم انفضها

وباي ذا طريق..حطيت كم سمايلي جداد..جداد عالبلوغ يعني ما ظنيت انهم جداد ع حدا



نراكم حين نراكم

:rick:


Suddenly Freed









اخيراً..وعلى حين غرة..فجأة لقيت حالي فاضي

كيف ليش وين مين بعرفش..المهم اني حاليا فاضي اشغال


السلافة انو هادا الفصل انعجقت انعجاق منقطع النظير..الفصل هادا طلع عنا نظام جديد بالجامعة

كل مادة صار الها بروجيكت .. كل بروجيكت فيهم عن مشروع تخرج

طلعولي بهالفصل 4 مشاريع من واسع علمو .. وهات عاد لحق ..ما بين هالمشاريع وقديش بدها شغل .. وما بين المواد الاخرى اللي ما فيها مشاريع بس فيها امتحانات

ومن حسن طالعي انو معظم الشباب اللي بعرفهم بالجامعة سكان الزرقا .. وانا سكان عمان .. فغالبا الاجتماعات اللي كان يتم فيها مناقشة امور المشاريع كانت تصير ببيت واحد من هالشباب اللي بالزرقا .. وبحكم اني الوحيد من عمان فانا اللي غالب الوقت كنت اسلخها مشوار للزرقا عشان نجتمع

زاد حم الوطيس ع نص الفصل لما قربت مواعيد التسليم والشاطر اللي يستلم مشروعو قبل .. وتزامنت هالفترة مع امتاحانات الميد والسكند .. مرت علي خلال هالفترة 72 ساعة ما جمعت فيهم ابو 8 ساعات نوم .. بطلت اعرف من وين بيجي الضرب .. ظهرت فيي خلال هالفصل عادات غريبة ما عهدتها في نفسي

المفروض اني بعرف حالي نومي خفيف..بس مثلا عالصويت والصياح والعويل ما بصحى..لازم يصير في تماس فيزيائي عشان اصحى

مرة نمت عند صاحبي وعرفت بعد ما صحيت انو كاين صاحبي الاخر كاين ييجي علي وانا نايم .. يرمي علي حرامات..مخدات..غطي بيبسي..كتب..دفاتر..ريموت تلفزيون..وانا ما عندي خبر

المفروض اني ما بحكي وانا نايم..ما عمرو حدا حكالي انك حكيت كذا كذا وانتا نايم..

مرة كنت نايم عند نفس الشب..بس صحيت بيحكيلي شو يا زلمة سبيس توون ماخدة عقلك..قال الاخ كاين يقلب بهالقنوات وقف عند سبيس تون كان عليها توم وجيري..ما لقاني الا بلشت اغني باللحن تاع الاغنية..انا خف عقلي بس سمعت هالحكي..

طول الفصل وانا نفسي بكم يوم هيك فش فيهم اشي مهم .. عبث .. اليوم تسليم بروجيكت الستيل..بكرة الترانسبورتيشن..بعديه ميد مختبر التربة..بعدو بيومين في سكند انشاءات..هييييييك لما بلش الفاينال

اجتني 4 امتحانات من النوع الثقيل خبط لزق ورا بعض..يوم ورا يوم حبيبي ما اجاني نوم..اليوم لسه لما خلصو

بس ترى لسه في عندي امتحان كمان اسبوع بس يعني الواحد مرتاح وممكن يعيش بشوية نقاهة

يا باااااي شو نفسي اشعبر..بس وجع راس..فكنا من الحكي الفاضي

الحلو بالموضوع اني اليوم فضيت ازبط شوية بهالخرابة..توصلت للخلطة السحرية اللي بتطلع هاي الليست اللي فيها البلوغات اللي بطلطل عليها من وقت لاخر..هسه مش عارف انو لما عملت الحركة هاي بيبين عندهم اني ضفتهم ولا لا..بدي اشوف ردة فعل نمرودة على موضوع انو صارلي بلوغ زيي زيها وصرنا جيران


شبعرت اكثر من اللازم وفوق حد الاشباع .. وبالمناسبة اللي ملهاش مناسبة..من الصبح نفسي بحبة تفاح اخضر



دعواتكم لنا بالتوفيق..ونراكم حين نراكم