Affection for Dinner


مساء الخير
مش عارف بصراحة احط اي مقدمة من اي نوع...فبالتالي عالسريع للمهم
من فترة صرت افكر بهالشغلة..انو طول عمرو الواحد اهم وجبة باليوم هي الغدا..عالاقل بالنسبة الي..من حيث انها غالبا بتكون طبخة..ولو مش طبخة بدها تكون مقالي ومتفرقات غالبا تؤكل ساخنة وغالبا فيها زيت قلي واشي من هالحكي
 
بس انو من فترة برضو صار وضع الدوام ما يسمحلي اروح ع وقت الغدا..يعني ما اخلص دوام قبل الخمسة..وطبعا بدك تحطلك ابو ساعتين مواصلات..ان وصلت بتوصل هلكان بتحط راسك وبتنام طب..
 
فاللي صار اني صرت اجي بدي اكل حوالي الساعة 9..ممكن تسخن وتاكل الغدا -في حال انو ضل منو اشي- بس اللي صار بالنسبة الي منطقي اكتر..اني اعمل عشا
بس هالعشا برضو منطقيا بدو يكون غير شكل..لانو بدو يعوض عن الغدا اللي راح...واحلى اشي بالعشا انك ممكن تشكل وتنوع من مليون صنف وخيار بمجرد انك تغير بشغلات بسيطة
 
يعني مثلا لو تيجي للصنف الاهم بالنسبة الي ع قائمة العشا الا وهو البيض
مكن تعملو مع فطر..وممكن مع جبنة مثلثات زي ما عادةً بعملو..ممكن مع سنيورة -فيما يسمى بنيوضة-..ممكن مع كتير شغلات تانية..
بلاش البيض..لو الواحد عندو شوية عسل او حلاوة او تطلي (تطلي يعني مربى..مش يعني تطرش او تدهن)..ممكن هالشغلات تتاكل مع زبدة..او مع قشطة..ويا حبذا لو الواحد عندو بالفريزر زبدة بيضا...
 
ممكن احكي امثلة اكتر من هيك بس الهدف انو ابين انو التنويع وارد جدا وسهل فيما يتعلق بوجبة العشا
بعدين بالنسبة للمشروبات عالعشا..هسه -برضو بالنسبة الي- ما بيلاقي الواحد اشي ينشرب عالغدا..يعني شوية مش منطقية انك تشرب بيبسي مع المنسف..او عصير موز مع الكبسة..وحتى لو صارت..بيكون الواحد ريقو ناشف ولا مضطر..ما ظنيت حدا بيحب الاكل يعملها
 
بس عالعشا..كاسة الشاي -المشروب الرسمي لوجبة العشا..مش هتحب حد قدها- تقريبا مع جميع اصناف العشا جائزة وواردة بالتواتر...وحتى كاسة الشاي ممكن الواحد ينوع بنكهاتها ما بين الميرمية والنعنع والهيل والقرفة وغيرو
 
على ألا يفهم من هالحكي اني ضد الغدا..انا بس بوضح الاختلافات بأساليب الادارة
بعتقد انو وصلت فكرتي...انا زلمة بحب اتعشا
ممكن هالبوست يبين شوي فايت بالحيط..بس مش عارف هادا اللي طلع معي
بكون ممنون الو اللي بيحكيلي ع شغلات ووصفات وطرق تانية للاستمتاع بالعشا
دامت الولائم حليفة دياركم العامرة


Peace out

5 Response to Affection for Dinner

  1. جرّب زبدة الفول السوداني مع العسل

    وصحة وعافية يا رب

  2. Em Ommar says:

    مش عارفه شو بدي اقولك

    بس بتصور كلمه
    سنحك شهيتني ع اكلات وزواكي

    بتكفي :???:

  3. nmroodeh says:

    يا سلااااااااااااام كل هاد
    والله ريتو صحة عا قلبك
    خود عندك كمان اكمن شغلة واردة للعشا..بس برضو بصيرش تثقل مشان بعدها تعرف تنام

    بتعرف النقانق
    بامكانك تفرمه وتقليه مع بيض
    بامكانك تقليه حب وتاكل بخبز حمام مع مايونيز وكتشب
    او تقليه مع فطر وبيض بطلع عندك فعفوط

    عندك جبنة بيضا حاف..جبنة بيضا مقلية..جبنة بيضا مفرومة مع زيتون اسود وخيار..اتسترا

    عندك المقدوس وعندك القشطة افرشلك معلقة بصحن ورش على وجهها شوية حلاوة فتفتها بايدك وكول واشكور وادعيلي

    يا بييي فتحت منافسي
    سنحك
    :sad:

    جرب اعمل سنيورة ولبنة مع زيتون اخضر حريف

    انا بقول اروح اكمل شغلي بلا ما تطلعلي مسج
    ur comment exceeded the letters limit :woops:

    مع تحيات
    نمرودة سناك
    :e:

  4. 6abaZa says:

    Abu Zaina
    will do inshalla 3al shopping el jay
    ultimate 7abeebona abo zaina

    Umm Omar
    :smile bejaker:
    :k:

    Nmroodeh
    من ضمن الشغلات اللي حكيتيها
    النقانق بعملها سندويشات زي ما حكيتي وبينحط عليها بطاطا كمان..بتطلع فاخرة

    والجبنة البيضا مع الخيار والزيتون برضو بتطلع لوحة فنية

    والحلاوة مع القشطة قضيت سنة اولى عليها..مرة جبت علبة حلاوة ع طعم الشوكالاطة..كنت اكلها بالمعلقة قد ما هي زاكية


    الباقي انشالله رح اجربو..خصوصي الفعفوط

    esma3 nasa2e7 namrood
    tashakorat afandeem

  5. sheeshany says:

    I`m a breakfast person! Always have, always been , always will be :)

    bas thx 4 the sharin` ,,, pipsi ma3 mansaf! lool , aslan no soda bel marrah lazim ...

    u remindd me of an old post of mine (2005) ! may be I shall reblog it (bwt life-style/coming home late/... bla bla bla + eating DISORDRZ) as a result :-)