A Dream


امبارح حلمت حلم جد غريب وملوش خص
كان في معي بالحلم اكمن ممثل اجنبي ناسي مين كانو..كنا ع اساس عصابة ورايحين نعمل عملية نصب او اشي زي هيك..المهم كنا طالعين بباص مؤسسة من رغدان..نزلنا من الباص عند الدفاع المدني اللي بيكون عاليمين وانتا رايح عالزرقا
فهمت منهم انو انا اللي رح اكون الطعم او الاشي اللي بدو يضحك عالطرف التاني..فرجوني بيت وقالولي بتروح عليه وبتنفذ اللي اتفقنا عليه..وهم عليهم ابصر وين يروحو ومن هناك يتصلو بالطوارئ..وبس تيجي الطوارئ والمطافي عالبيت اللي رح اكون انا فيه ساعتها رح تبلش الخطة ومن هالحكي..بس المهم بالموضوع انو انا ما انشغل بأي اشي

المهم وصلت البيت..شقة هيك كانها تاني طابق ببناية قديمة
فتحت الباب في زي ممر..اول ما تفوت في عاليسار كاونتر واقف وراه هيك طباخ صيني..لون الجو كان زي الزهري
المهم انا بس فتحت الباب خف عقلي من الريحة الصح اللي بالمكان..بقول للطباخ انو يعني شو هالريحة اللي من الاخر اللي عندك..بيحكيلي اه احنا بنطبخ وهيك اذا جيعان..بقوللو شو اكتر اشي العالم بتطلبو من هون..بيحكيلي سندويشات جاج بالكاري..أشرلي على كرتونة بالممر فيها زي قطع سمك فيليه..بس جاج مش سمك!..ومطبوخة خالصة!..فانو خف عقلي انو ليش حاطهم بكرتونة
المهم انا عند هاللحظة يعني فهمت انو انا نسيت كل اشي من الخطة..اللي انا اصلا مش عارف شو هي..يعني هيك انا بكون التهيت
جبتلو الكرتونة فبلش هو يعملي 3 سندويشات خبز فرنسي..مجرد انو حط قطع الجاج اللي زي السمك بالخبز وابصر شو حط عليهم كمان..اعطاني السندويشات ملفوفات بقصدير.. انزويت هيك بمكان وبلشت ألغّ.......فعليا ازكى سندويشة دقتها بحياتي..ياااابي شو زاكية..شوي ولا هم الاسعاف والمطافي اجو..وتذكرت انو انا كان في خطة مفروض انفذها..بس لسه ضايل سندويشتين وانا مش رح اضحي فيهم بصراحة...طنشت الخطة كلها مع اني عارف انو افراد العصابة التانيين رح يطخوني لاني ما عملت المهمة
المهم نزلت زي الشطار بدي اشوف الاسعاف والمطافي شو بدهم يسوو وانا بكل برادة قاعد باكل بالسندويشات ولا الي خص....ولا هو بينزل من سيارة المطافي بني ادمين خارقين ع اساس..زي ما تقولو اكمن سوبرمان هيك
نزلو وبلشو يصيحو ع تاع المطعم المسخم اللي صار محبوس فوق ابصر ليش ومطلع راسو من الشباك برضو ابصر ليش...قال احنا اجانا اتصال انك عامل هيك هيك ومخرب ممتلكات دولة ومتاجر بممنوعات ووووو...إلخ
الزلمة بيحلف وبيعيط والله ما عملت اشي انا انتصب عليّ وانتو فاهمين غلط ومن هالحكي...ما ردو عليه وطخو عليه باسلحة غريبة بتطلع ضواو وليزر وتلج وعمدان كهربا..كسرو الدنيا وما خلو اشي وحملو حالهم وروحو

هون انا صحيت....خفان عقلي انو شو بالنسبة؟!؟!؟
بس خفان عقلي بزيادة لانو طعم السندويشة كان لسه معلق بحلقي..وتذكرت قديش كانت السندويشة من الاخر!!!...وهسه انا مش عارف من وين اجيب هالحج الصيني يعمللي جاج بالكاري زي اللي عمللي اياه بالحلم....

ياللأسف..!

العبرة من الحلم (على ما اعتقد)...اذا حلمت انك بموقف صعب لازم تختار فيه بين سندويشة زاكية وعملية نصب حساسة...سيبك من العملية واستمتع بالسندويشة...لانو غالبا افراد العصابة ما رح يلحقو يطخوك قبل ما تصحى

تصبحون على خير


13 Response to A Dream

  1. Em Ommar says:

    شكلي انا اللي بدي أطخك,, لإني ضعت وأنا بقراء
    :mal5oom:

    جاج بالكاري,, كيف طعمه هاد
    وشكله زي السمك الفليه :sad:

    ليش دايمن مواضيعك فيها أكل,, بتحسسني إنك ست البيت الأموره :???:

  2. Finalway says:

    وارااادييي


    ههههههههههههههههه انا قعدت اضحك مالحقتش اخر الحلم ... اضغاث احلام ... بس التهيت بالسندويشات... قامت الدنيا ..

    ابصر ببالك ايش او متقل على العشا لما حلمت ...

    لووول للصبح

  3. sheeshany says:

    خيرا ً تلقاه و شرا ً تتوقاه

    عالم الأحلام لغز فعلا ً :)

    أما أحلى شي "هو يعملي 3 سندويشات خبز فرنسي"
    لوووول

  4. w7l says:

    طيب حقوق هالحلم محفوظة؟ بلكي عملناها فلم اخذ كم صنم من اصنام الاوسكار

  5. Anonymous says:

    looooooooooooooooooooooooooooo^98752856783453465982365llllll
    :woops:
    7a$a$ rasmi :woops:
    روح على اي مطعم صيني بعملك سندويشة جاج بالكاري عا كيفك
    في واحد بمكة مول جنب البيتزا هت بطابق المطاعم
    :e:

    Nmroodeh

  6. 6abaZa says:

    Umm Omar
    معلوم بدك تضيعي...لانو البوست اسمو حلم ومحطوط فيه صورة واحد مش عارف وين مصلحتو
    بالزبط!..ست البيت الأمورة..وسنحة تسنحك!
    طب خدي عندك
    قبل فترة حلمت بالشغيلة اللي بمطعم بخاري اللي بماركا اذا بتعرفيه
    حلمت انو واحد منهم فايت بالسر عندي عالبيت فشاف حبال غسيل منشور عليهم سمك بغرفة القعدة..فانو انبسط وصار من الشباك يفرجيهم لباقي الشغيلة اللي كانو متسللين عالشقة اللي قبالنا..واللي ناشرين عندهم سمك ع حبل غسيل بغرفة القعدة برضو

    :smile...maroko lamma y5ef 3agelha:


    FinalWay
    وانتا الصادق شكلي كنت حاضر فيلم هندي ع قناة فتاتيت قبل ما انام...فش غير هيك


    Haitham
    الله يسعدك ع هيك دعوة شو جميلة
    لازم الواحد يصير يكتب كل اشي بيحلمو عشان يقعد بعديها بفترة ويزبهل من اللي رح يقرؤو


    W7l
    مش محفوظة ولا عليها اي قيد...قابلة للطي والتعديل ع مراقك


    نورت المدونة
    هلا عمي


    Nmroodex
    أجنن وانا بحلم

    :smile thnan el 3abee6:

  7. sheeshany says:

    هذا ما هو حلم! هذا واقع ===> عليك واااااجب :)

    http://sheeshany.blogspot.com/2010/12/blog-post_11.html

  8. sheeshany says:

    هذا ما هو حلم! هذا واقع ===> عليك واااااجب :)

    http://sheeshany.blogspot.com/2010/12/blog-post_11.html

  9. sheeshany says:

    aloooooooo
    any body theeeeeeeeeeere
    waaainak :)

  10. Anonymous says:

    ههههههههههههههههههه حلم بيكسبك ذهب اذا كتبته روايه

  11. model says:

    ليك انا تابعت الحلم لان كله اكل و انا عاملة مدونة اسمها عايزة اخس لاني بامنوت في الاكل
    لكن فعلا تهت منك
    ليش يا زلمةهيك
    بالقليلة فسرلي الحلم
    افيدونا

    موديل

  12. اخي يسعدني العثور بمدونتك والتعليق فيها ،، يارب تظل تحلم على طول بس تكون احلام حلوة مش كوابيس ...
    تقبل مروري.

  13. model says:

    اللهم اجعله خير ، شر لنا خير لعدانا و عداك
    انا اجد صعوبة في تذكر احلامي
    اعتقد لا بد من وضع قلم و ورقة بجانب المخدع لتذكر الرؤى

    موفق ان شا اله

    موديل